Ævar Þór á 39 höfunda lista Hay Festival í Árósum

Ævar Þór

Safnrit evrópskra barna- og ungmennabókahöfunda

Ævar Þór Benediktsson er einn þeirra 39 evrópsku barna- og ungmennabókahöfunda sem hefur verið boðið að birta sögu í safnriti er kemur út á vegum alþjóðlegu barnabókahátíðarinnar Hay Festival í Árósum í Danmörku á þessu ári. Þetta var tilkynnt á Bókamessunni í London í dag, þann 15. mars 2017. Höfundarnir eru allir undir fertugu og eru valdir af alþjóðlegri dómnefnd sem úrval upprennandi höfunda sem skrifa fyrir börn og unglinga í Evrópu.

Ævar Þór, best þekktur sem Ævar vísindamaður, er staddur í London til að veita viðurkenningunni móttöku og taka þátt í pallborðumræðum um barnabækur.

festival-aarhus39

Í tilkynningu frá útgefanda Ævars, Forlaginu, segir að Ævar sé að vonum ánægður: „Þetta er mikill heiður og virkilega gaman að komast þarna á blað. Íslenskar barnabækur eru vel á pari við þær erlendu.”

Höfundarnir á listanum koma til með að vinna saman að metnaðarfullu verkefni fyrir hátíðina í Árósum, sem er menningarborg Evrópu 2017. Í október verður alþjóðlega barnabókahátíðin Hay Festival haldin þar í borg, en hún er angi af hinni þekktu Hay Festival í Wales, sem haldin verður í maí á þessu ári. Gefin verða út safnrit með sögum höfundanna 39 í vor og koma þau út bæði á dönsku og ensku.

Í dómnefnd sátu þrír virtir barnabókahöfundar; Kim Fupz Åkeson frá Danmörku, Ana Cristina Herreros frá Spáni og Matt Haig frá Englandi. Höfundarnir sem valdir voru fengu það verkefni að skrifa sögu byggða á þemanu „ferðalag“ en sögurnar koma út í fyrrnefndum söfnum hjá Alma Books í Bretlandi og Gyldendal í Danmörku. Saga Ævars, ,,Bókaflóttinn mikli”, fjallar um einstaklega vaskan bókasafnsfræðing sem kemst í hann krappan.

Næsta bók Ævars kemur út nú í maí og verður sú þriðja í röðinni um bernskubrek Ævars vísindamanns. Hún ber nefnið Gestir utan úr geimnum. Bókin er ákveðinn lokahnykkur í þriðja Lestrarátaki Ævars en að vanda voru nöfn fimm heppinna krakka dregin úr þátttökupottinum og verða þau að persónum í bókinni. Að þessu sinni var það Guðni Th. Jóhannesson, forseti Íslands, sem dró úr pottinum. Aldrei hafa verið lesnar fleiri bækur í átakinu en í ár, rúmlega 63 þúsund talsins. Ævar hefur boðað að átakið verði haldið í fjórða sinn næsta vetur.

Vefur Hay Festival í Wales

Vefur Hay Festival í Árósum

Höfundarnir 39

Eftirtaldir höfundar munu eiga sögur í safnritunum:

1. Ævar Þór Benediktsson – Ísland
2. Alaine Agirre – Spánn
3. Aline Sax – Belgía
4. Ana Pessoa – Portúgal
5. Andri Antoniou – Kýpur
6. Anna Woltz – Holland
7. Annelise Heurtier – Frakkland
8. Annette Münch – Noregur
9. B. R. Collins – Bretland
10. Cathy Clement – Luxemborg
21. Katherine Rundell – Bretland
22. Katherine Woodfine – Bretland
23. Laura Dockrill – Bretland
24. Laura Gallego – Spánn
25. Ludovic Flamant – Belgía
26. Maria Parr – Noregur
27. Maria Turtschaninoff – Finnland
28. Michaela Holzinger – Austurríki
29. Nataly Elisabeth Savina – Lettland
30. Nina Elisabeth Grøntvedt – Noregur
11.Cornelia Travnicek – Austurríki
12. David Machado – Portúgal
13. Dy Plambeck – Danmörk
14. Elisabeth Steinkellner – Austurríki
15. Endre Lund Eriksen – Noregur
16. Finn-Ole Heinrich – Þýskaland
17. Frida Nilsson – Svíþjóð
18. Gideon Samson – Holland
19. Inna Manakhova – Rússland
20. Jana Šrámková – Tékkland
31. Peder Frederik Jensen – Danmörk
32. Salla Simukka – Finnland
33. Sandrine Kao – Frakkland
34. Sanne Munk Jensen – Danmörk
35. Sarah Crossan – Írland
36. Sarah Engell – Danmörk
37. Stefan Bachmann – Sviss
38. Stefanie de Velasco – Þýskaland
39. Victor Dixen – Frakkland