Bókamessa í Bókmenntaborg

harpa

Félag íslenskra bókaútgefenda og Reykjavík Bókmenntaborg UNESCO standa fyrir Bókamessu í Bókmenntaborg í sjötta sinn helgina 19. og 20. nóvember. Messan hefur nú fært sig um set og verður haldin í Hörpu í fyrsta sinn. Sýningarsvæðið verður í Flóa á fyrstu hæð hússins og fjölbreytt dagskrá fyrir börn og fullorðna verður á sýningarsvæðinu og í sölum sem að því liggja. Flói er norðvestan megin í húsinu, fyrir innan veitingahúsið Smurstöðina.

bokamessa-2015_-077-roman-gerasymenko

Bókamessan er opin frá kl. 11 – 17 báða dagana. Sérstakt krakkahorn verður á svæðinu þar sem boðið verður upp á smiðjur og föndur. Börnin geta einnig tekið þátt í ratleik með Snuðru og Tuðru, hitt Vísinda-Villa og Stjörnu-Sævar eða litið í nýjar bækur í bókahorninu.

Nýjar bækur, smiðjur, upplestrar og eitthvað gott að smakka

Á sýningarsvæðinu verður hægt að fylgjast með myndskreytum teikna, smakka mat, fylgjast með fólki skreyta kökur með bundið fyrir augun, blaða í bókum ársins og spjalla við höfunda.

Fjölbreytt dagskrá verður báða daga með upplestrum og spjalli við höfunda

Meðal dagskráratriða verður pallborð á laugardeginum með fimm alþjóðlegum glæpasagnadrottningum undir stjórn Katrínar Jakobsdóttur. Einnig verður spjallað við höfunda íslenskra bóka báða dagana, boðið upp á ljóðadagskrá og margt fleira.

Harpa mun iða af lífi þessa daga, ekki láta þetta tækifæri til að kynna þér útgáfu ársins framhjá þér fara!

vefur-bordi1

 

Sjá alla dagskrá Bókamessu.