Gröndalshús opnað

Gröndalshús

Frítt inn um þjóðhátíðarhelgina

Gröndalshús verður opnað almenningi á þjóðhátíðardegi  Íslendinga, 17.  júní næstkomandi. Húsið hefur verið gert upp og verður það rekið sem menningarhús í  í Grjótaþorpinu  í minningu Benedikts Gröndals (1826 - 1907), skálds, myndlistarmanns og fræðimanns, sem bjó þar síðustu tuttugu ár ævinnar.

Borgarstjóri, Dagur B. Eggertsson,  opnar húsið formlega föstudaginn 16. júní kl. 16.00 að viðstöddum fjölmiðlum en á á laugardaginn verður það opið  almenningi í fyrsta sinn.

Dagskrá á sunnudag

Sunnudaginn 18. júní kl. 15.00 og aftur kl 16.00 mun Ragnheiður Gröndal flytja nokkur lög í húsinu og Guðmundur Andri Thorsson, rithöfundur,  spallar um skáldið Benedikt Gröndal og verk hans. Dagskráin er öllum opin á meðan húsrúm leyfir.

Húsið, sem stóð upprunalega við Vesturgötu 16a, stendur nú á horni Fishersunds og Mjóstrætis.  

Í húsinu verður minning  skáldsins Benedikt Gröndal heiðruð og ævi hans og verk kynnt.  Einnig er Reykjavík á tímum Gröndals gerð skil á sýningunni. Benedikt bjó í húsinu ásamt dóttur sinni Helgu og tveimur vinnukonum  í tuttugu ár, eða þar til hann lést í ágúst árið 1907. Þarna vann hann mörg af sínum helstu verkum, til að mynda margar myndanna sem eru uppistaðan í bókunum Dýraríki Íslands og Íslenskir fuglar. Einnig skrifaði Gröndal sjálfsævisögu sína, Dægradvöl, á meðan hann bjó  í húsinu og ritgerðina "Reykjavík um aldarmótin 1900". 

Hús skáldsins

Benedikt Gröndal

Vinnuaðstaða fyrir rithöfunda, fræðimenn og þýðendur verður í risi hússins og í kjallaranum er skáldaíbúð þar sem Bókmenntaborgin Reykjavík mun bjóða erlendum listamönnumað dvelja  til skemmri tíma til að kynnast íslenskri menningu, landi og þjóð. 

Frítt er inn í Gröndalshús opnunarhelgina en eftir það verður  aðgangseyrir þúsund krónur. Opnunartími er frá 13-17 fimmtudaga til sunnudaga.  Arkitektinn Hjörleifur Stefánsson teiknaði endurgerð hússins en Minjavernd hafði umsjón með endurbótunum.

Reykjavikurborg á Gröndalshús og verður það á forræði Reykjavíkur Bókmenntaborgar UNESCO. Icelandair Group styður Bókmenntaborgina við að opna Gröndalshús fyrir almenningi. 

Sýningarhönnuðir í húsinu eru Snæfríður Þorsteinsdóttir og Hildigunnur Gunnarsdóttir. Margmiðlunarsýningu hönnuðu Phoebe Jenkins og Ben Moody. Textagerð og umsjón með texta var í höndum Guðmundar Andra Thorssonar og Kristínar Viðarsdóttur og Sarah Brownsberger þýddi texta eftir Gröndal og aðra sýningartexta á ensku.  Sýningarstjórar í húsinu eru Kristín Viðarsdóttir og Lára Aðalsteinsdóttir.