NonfictioNOW í Reykjavík 1. - 4. júní

Aisha Sabatini Sloan

Hátt í 400 rithöfundar eru væntanlegir til Reykjavíkur til þátttöku í NonfictioNOW. Þessi alþjóðlega ráðstefna verður í Háskólabíói og Hörpu dagana 1. - 4. júní. 

Ráðstefnan NonfictioNOW hefst formlega þann 1. júní í Háskólabíói með málstofu og sýningu kvikmyndarinnar Draumalandsins sem byggir á samnefndri bók Andra Snæs Magnasonar. Dagana 2. og 3. júní verða málstofur í Háskóla Íslands þar sem fjallað verður um sannsöguleg skrif í öllum sínum fjölbreytileika og 2. og 4. júní verður boðið upp á sérstaka fyrirlestra í Silfurbergi í Hörpu. Einnig verður boðið upp á höfundakvöld með innlendum og erlendum rithöfundum í Norræna húsinu, en meðal íslenskra þátttakenda eru Jón Gnarr, Elísabet Jökulsdóttir og Vilborg Davíðsdóttir. Forseti Íslands, Hr. Guðni Th. Jóhannesson, slítur ráðstefnunni á eftir síðasta fyrirlestrinum í Hörpu 4. júní.

Skoðið dagskrána og skráið ykkur á ráðstefnuna hér: www.nonfictionow.org

 

Karl Ove Knausgaard

Opin dagskrá í Hörpu

Einnig er hægt að kaupa miða á fyrirlestrana í Hörpu sérstaklega:

  • 2. júní, kl. 15:45-16:45: Gretel Ehrlich
  • 2. júní, kl. 19:30-20:30: Karl Ove Knausgaard
  • 4. júní, kl. 10:00-11:00: Aisha Sabatini Sloan
  • 4. júní, kl. 11:30-12:30: Wayne Koestenbaum

Miði á einn fyrirlestur kostar 1.000 kr. en 3.000 kr. á alla fjóra.

Kaupið miða hér: https://www.harpa.is/dagskra/

 

 

 

Gretel Ehrlich

Meira um höfundana í Hörpu á NonfictioNOW: 

Bandaríski rithöfundurinn Gretel Ehrlich hefur gefið út 15 bækur og hefur unnið til verðlauna fyrir Solace Of Open Spaces, This Cold Heaven, Seven Seasons in Greenland og nú nýlega, Facing the Wave.

Norðmaðurinn Karl Ove Knausgaard sló rækilega í gegn með sjálfsævisögu sinni í sex hlutum, Min Kamp. Sumir gagnrýnendur telja hann vera mesta rithöfund Norðmanna á eftir Henrik Ibsen.

Hin unga Aisha Sabatini Sloan, sem kemur frá Bandaríkjunum, hefur hlotið lof fyrir sjálfsævisögu sína The Fluency of Light: Coming of Age in a Theater of Black and White og þegar unnið til verðlauna fyrir væntanlegt ritgerðasafn.

Ljóðskáldið og rithöfundurinn Wayne Koestenbaum frá Bandaríkjunum hefur gefið út fjölda bóka og ljóðasafna, m.a. hina vinsælu The Queen’s Throat: Opera, Homosexuality, and the Mystery of Desire.

 

 

Wayne Koestenbaum

Um ráðstefnuna

NonfictioNOW ráðstefnan, sem helguð er óskálduðu efni af öllum toga, var stofnuð í Bandaríkjunum árið 2005 og er haldin annað hvert ár. Þetta er í fyrsta skipti sem hún er haldin í Evrópu.