Teikningar í bókinni eru eftir Gísla B. Björnsson og Peter Schürmann.
Úr Á faraldsfæti:
1. júlí
Út um tvö leytið. Drakk kaffi á Frascati við Ráðhústorg. Það rigndi dálítið og gott að sitja í vari undir seglinu, horfa á umferðina og rauð húsin sem ljá torginu léttan svip. Byggingarnar hér við Kóngsins Nýjatorg eru mun ,,þungstígari. Klukkuslögin úr turni ráðhússins komu svífandi niður í umferðina. Á gangstéttunum voru menn af öllum kynþáttum - nema indíánar. Fyrstu neon-ljósin kviknuðu inni á Strikinu, þó enn væri albjart af degi. Dannebrógar blöktu víða á húsþökum. Lét Vinar-tónlist innan úr kaffihúsini, og nokkrir Íslendingar sem ég kannaðist við, gengu hjá, en ég kærði mig ekki um að veifa til þeirra. Fuglar, ekki stærri en barnshnefar, trítluðu um kaffistéttina, undir borðunum og á milli þeirra, svo spakir að ég mátti gæta þess að stíga ekki ofan á þá óvart og kremja þá.
(10-11)
