Endurminningar Kristins Hallssonar söngvara.
Af bókarkápu:
Kristinn Hallsson er örugglega einn af skemmtilegustu mönnum þjóðarinnar. Vinsældir hans og farsæld helgast ekki aðeins af óumdeildum hæfileikum heldur einnig af alþýðleika hans, landsþekktu skopskyni og léttleika. hann hefði getað orðið heimsnafn en atvikin höguðu því þannig að hann gerðist þess í stað einn af frumherjum óperuflutnings á Íslandi og ein stoðin í því sönglífi sem hér hefur vaxið og dafnað.
Þótt valinkunn bassarödd Kristins Hallssonar muni ekki hljóma aftur á óperusviðinu berst hún af síðum þessarar bókar full af frásagnargleði og húmor. Hér talar söngmaðurinn, gleðimaðurinn, embættismaðurinn, sagnamaðurinn og fjölskyldufaðirinn. Kristinn lyftir spéspegli að samtíð sinni og sjálfum sér, horfir glaður um öxl og saga hans er sannarlega góðra vina fundur.