Rafrænar menningargöngur

Nú er hægt að fara í bókmenntagöngu með leiðsögn hvenær sem er. Vinsælar bókmenntagöngur hafa verið færðar í rafrænt form og er hægt að nálgast þær með því að hlaða niður appinu Reykjavik Culture Walks.

Göngur fyrir alla

Í appinu eru nú fjórar göngur á íslensku, fjórar á ensku, tvær á spænsku og ein á þýsku. Meðal annars er þarna að finna ensku gönguna Literary Reykjavík, sem kynnir bókmenntir frá mismunandi tímum, aðra göngu á ensku þar sem glæpasögur Arnaldar Indriðasonar eru í brennidepli og íslenska krimmagöngu með þátttöku nokkurra af okkar þekktustu glæpasagnahöfundum. Þá er ein ganga helguð slóðum Nóbelsskáldsins Halldórs Laxness í miðbænum. Einnig er ganga á þýsku sem kynnir íslenska bókmenntasögu frá söguöld til okkar tíma og ganga á íslensku og ensku um landnámið í Reykjavík unnin af Borgarsögusafni Reykjavíkur. Spænsku göngurnar eru annars vegar glæpasagnaganga og hins vegar ganga þar sem ýmsar bækur frá ólíkum tímum koma við sögu. Fleiri göngur munu síðar bætast við.

Göngurnar eru aðgengilegar í smáforritinu Reykjavik Culture Walks og er hægt að hlaða þeim niður frítt í App Store  og Playstore á  öll iPhone eða Android tæki.