Allir lesa – landsleikur í lestri

Allirlesa2

Allir lesa, landsleikur í lestri er nú haldinn í þriðja sinn. Leikurinn hefst föstudaginn 27. janúar 2017 og stendur út þorra eða til konudagsins 19. febrúar. Allir geta tekið þátt, börn jafnt sem fullorðnir, og hvar svo sem fólk býr á landinu. Það eina sem fólk þarf að gera er að skrá sig á vefinn allirlesa.is og byrja að lesa. Hægt er að keppa í liðum eða sem einstaklingur, eða hvoru tveggja. Leikurinn er hvatning til að lesa meira og er keppt í því hver ver mestum tíma í lestur á þessu tímabili, en ekki í því hversu margar blaðsíður eru lesnar.

Hægt er að keppa sem einstaklingur eða í liði eins og áður segir. Liðakeppnin skiptist í tvo flokka: vinnustaðaflokk og opin flokk og er keppnin tilvalin leið til að skemmta sér saman við lestur og spjall um bækur um leið og keppt er til sigurs. Hægt er að mynda lið á vinnustaðnum, með fjölskyldunni, leshringnum eða hverjum sem lesa vill.

Auðvelt er að skrá sig til leiks og hægt að skrá sig til keppni hvenær sem er á keppnistímabilinu. Allar bækur eru gjaldgengar, óháð efni, tungumáli eða formi. Þannig eru prentaðar bækur, rafbækur og hljóðbækur allar gjaldgengar. Aðalatriðið er að skemmta sér við lesturinn, hvort sem skáldsögur, fræðibækur, ljóðabálkar eða eitthvað allt annað verður fyrir valinu.

Lesum til sigurs!

Aðstandendur Allir lesa eru Miðstöð íslenskra bókmennta og Reykjavík Bókmenntaborg UNESCO með stuðningi frá Reykjavíkurborg og Mennta- og menningarmálaráðuneytinu.

hvaðlestþú