Reykjavík Bókmenntaborg UNESCO

Reykjavík var útnefnd ein af Bókmenntaborgum UNESCO í ágúst 2011. Titillinn er varanlegur, en í honum felst mikil viðurkenning á stöðu bókmenningar í Reykjavík og gildi orðlistar bæði í sögu og samtíð. Reykjavík var fimmta borgin í heiminum til að hljóta titilinn og sú fyrsta sem ekki tilheyrir ensku málsvæði.

Í útnefningunni segir meðal annars að Reykjavík státi af framúrskarandi bókmenntahefð í formi ómetanlegra miðaldabókmennta sem varðveittar eru í borginni og eru Íslendingasögurnar, Eddukvæði og Íslendingabók nefnd sérstaklega. Þá segir að þessi rótgróna hefð sýni sig í varðveislu, miðlun, bókmenntakennslu og kynningu bókmennta í dag.  Einnig er tekið til þess að svo fámenn borg sinni bókmenntum af jafn miklum krafti og raun ber vitni, með þátttöku og samvinnu ólíkra aðila sem koma að bókmenningu og miðlun bókmennta, svo sem útgefenda, bókasafna og rithöfunda.

Sem Bókmenntaborg UNESCO leggur Reykjavíkurborg áherslu á góða samvinnu við alla þá mörgu aðila sem koma að bókmenningu í borginni, því Bókmenntaborgin Reykjavík er fyrst og fremst sameign þeirra allra, svo og íbúa borgarinnar.

Leiðarljós:

Að Reykjavík verði þekkt sem borg orðlistar, jafnt innanlands sem og á alþjóðlegum vettvangi .

Að stoðir hennar verði styrktar í nánu samstarfi þeirra sem koma að menntun, bókmenntum og orðlist á breiðum vettvangi.

Reykjavík  Bókmenntaborg UNESCO stendur vörð um tjáningarfrelsi. Íslensk einkunnarorð Bókmenntaborgarinnar, Orðið er frjálst, endurspegla þessa áherslu og með þeim vill Bókmenntaborgin benda á að hvorki einstaklingar né samfélög geta þrifist á heilbrigðan hátt nema þegnunum sé frjálst að tjá sig, þrár sínar og sannfæringu.

Markmið

Að halda utan um það mikla starf sem er unnið á sviðum bókmenningar og orðlistar og það kynnt.
Að hvetja til samstarfs og nýrra verkefna.
Að efla alþjóðatengsl á vettvangi orðlista og annarra skapandi greina.

Aðsetur

Menningar- og ferðamálasvið Reykjavíkur hýsir verkefnið Reykjavík Bókmenntaborg UNESCO og er skrifstofa Bókmenntaborgarinnar á skrifstofu sviðsins að Vesturgötu 1.

Reykjavík Bókmenntaborg UNESCO
Vesturgötu 1, 101 Reykjavík
S: 590-1520 / 590-1524
bokmenntaborgin@reykjavik.is