Lestrarhátíð 2013

Eitt af stærri verkefnum Reykjavíkur Bókmenntaborgar UNESCO er að standa fyrir árlegri lestrarhátíð í Reykjavík í samvinnu við stofnanir, félagasamtök og aðra sem starfa á bókmenntasviðinu. Slík hátíð var haldin í fyrsta sinn í október 2012. Lestrarhátíð er fyrir fólk á öllum aldri en í þetta fyrsta sinn var athyglinni sérstaklega beint að unglingum og ungu fólki.

Hátíðin er hugsuð sem grasrótarhátíð þar sem allir þeir sem vilja bjóða upp á viðburði og dagskrá sem tengist þemanu hverju sinni geta tekið þátt. Hátíðin stendur allan mánuðinn.

Lestrarhátíð 2013 – Ljóð í leiðinni

Lestrarhátíð 2013 – Ljóð í leiðinni – var helguð Reykjavíkur- og borgarljóðum. Þar var borgin í brennidepli í öllum sínum fjölbreyttu myndum og sá aragrúi ljóða og söngtexta sem hafa verið skrifaðir um hana.

ljóð-í-leiðinni

Forlagið Meðgönguljóð var sérlegur samstarfsaðili að hátíðinni og gaf það út ljóðabókina Ljóð í leiðinni: Skáld um Reykjavík. Bókin inniheldur 27 ljóð um borgina eftir jafn mörg skáld. Flest ljóðin voru samin í tilefni hátíðarinnar, en einnig eru nokkur eldri ljóð í bókinni. Mörg okkar þekktari skálda eiga þarna ljóð, en einnig yngri og óþekktari skáld. Ármann Jakobsson ritar formála en ritstjórar eru þau Kári Tulinius og Valgerður Þóroddsdóttir.

Bókin var einnig gefin út sem rafbók hjá eBókum.

Meðal þess sem boðið var upp á í október 2013 voru ljóð í strætó, en Strætó bs gekk til liðs við Bókmenntaborgina og gátu farþegar notið ljóðskreyttra vagna í mánuðinum. Einnig voru brot úr ljóðum utan á vögnunum og á strætóskýlum.

Veggspjaldasýningin Ljóðið ratar til hinna, sem ljóðskáldið Dagur Hjartarson hafði veg og vanda að, var sett upp víðs vegar um borgina. Hana prýddu borgarljóð eftir fjölda skálda.

Einnig var pólsk-íslenska ljóðaverkefnið ORT hluti af hátíðinni.  Pólsk ljóð í íslenskum þýðingum og íslensk ljóð í pólskum þýðingum voru þar í brennidepli.

Í lok mánaðarins blésu Bókmenntaborgin og Félag tónskálda og textahöfunda til tónleika í Hörpu í tilefni Lestrarhátíðar og 30 ára afmælis félagsins þar sem orðlistin var í öndvegi. Einnig héldu þessir sömu aðilar málþing sömu helgi þar sem orðlistin var í forgrunni.

Ljóð í leiðinni á bokmenntaborgin.is

Helstu samstarfsaðilar Bókmenntaborgarinnar að Lestrarhátíð 2013 – Ljóð í leiðinni voru: Arion banki, Borgarbókasafn Reykjavíkur, Meðgönguljóð, eBækur, Strætó bs og pólsk-íslenska ljóðaverkefnið ORT.

Arion bankiMeðgönguljóðeBækur    Borgarbókasafn Reykjavíkur     StrætóORT logo