Tilnefningar til viðurkenningar Hagþenkis 2017

TÍU FRAMÚRSKARANDI FRÆÐIRIT TILNEFND

Tilnefningar til Viðurkenningar Hagþenkis 2016 voru kynntar í Borgarbókasafninu í Grófarhúsi fimmtudaginn 2. febrúar 2017.

Hagþenkir, félag höfunda fræðrita og kennslugagna, hefur frá árinu 1986 veitt viðurkenningu fyrir fræðirit, námsgögn eða aðra miðlun fræðilegs efnis til almennings. Árið 2006 var tekin upp sú nýbreytni að tilnefna tíu bækur er til greina kæmu. Viðurkenningaráð Hagþenkis, skipað fimm félagsmönnum til tveggja ára í senn, stendur að valinu en það hóf störf um miðjan október og fundaði vikulega. Ráðið skipuðu þau Baldur Sigurðsson, Guðný Hallgrímsdóttir, Kristinn Haukur Skarphéðinsson, Sólrún Harðardóttir og Þórunn Blöndal.

EFTIRFARANDI RIT OG HÖFUNDAR ERU TILNEFND Í ÁR:

Ársæll Már Arnarsson: Síðustu ár sálarinnar. Háskólaútgáfan gaf út.

Fléttað er saman á líflegan hátt hugmyndum ólíkra fræðigreina um sálina, allt frá Forn-Grikkjum til vorra daga.

Bergsveinn Birgisson: Leitin að svarta víkingnum. Bjartur gaf út.

Ævintýraleg saga Geirmundar heljarskinns lifnar í samspili við fræðilega rannsókn höfundar og úr verður nýstárleg og trúverðug frásögn.

Elín Bára Magnúsdóttir: Eyrbyggja saga. Efni og höfundareinkenni. Bókmennta- og listfræðistofnun Háskóla Íslands og Háskólaútgáfan gáfu út.

Aðgengileg greining á flókinni sögu og höfundi hennar er sett í samhengi við valdabaráttu þjóðveldisaldar.

Garðar Gíslason: Á ferð um samfélagið. Þjóðfélagsfræði. Menntamálastofnun gaf út.

Vel ígrundað námsefni sem hvetur nemendur til að nota fjölbreyttar heimildir og hugsa á gagnrýninn og skapandi hátt.

Guðrún Ingólfsdóttir: Á hverju liggja ekki vorar göfugu kellíngar. Bókmenning íslenskra kvenna frá miðöldum fram á 18. öld. Háskólaútgáfan gaf út.

Ítarlegt verk um lítt kannað efni sem varpar ljósi á sambúð kvenna og bóka á miðöldum.

Helgi Hallgrímsson: Fljótsdæla. Mannlíf og náttúrufar í Fljótsdalshreppi. Skrudda gaf út.

Af alúð og víðtækri þekkingu er fléttað saman sögu, náttúru og mannlífi í Fljótsdal. Vandað og ríkulega myndskreytt verk.

Hrefna Róbertsdóttir og Jóhanna Þ. Guðmundsdóttir (ritstj.): Landsnefndin fyrri 1770–1771. Den islandske Landkommission 1770–1771, I og II. Þjóðskjalasafn Íslands. Sögufélagið gaf út.

Einstaklega vönduð útgáfa á frumheimildum um íslenskt samfélag á 18. öld. Ítarlegur inngangur, orðskýringar og vefsíða gefa verkinu aukið gildi.

Steinunn Knútsdóttir: Lóðrétt rannsókn. Ódauðleg verk Áhugaleikhúss atvinnumanna 2005–2015. Listaháskóli Íslands og Háskólaútgáfan gáfu út.

Óvenjuleg innsýn í hugmyndafræði um leikhús og hvernig unnið er að leikverkum frá fyrstu hugmynd til sýninga.

Viðar Hreinsson: Jón lærði og náttúra náttúrunnar. Lesstofan gaf út.

Með nærfærnum hætti er fjallað um ævintýralegt lífshlaup manns á mörkum forneskju og nútímafræða í samhengi við evrópska vísindasögu.

Úlfhildur Dagsdóttir: Sjónsbók. Ævintýrið um höfundinn, súrrealisma og sýnir. JPV gaf út.

Fjallað er af þekkingu og innsæi um verk sérstæðs höfundar og ferillinn tengdur við lífssýn hans og stefnur í listum.