Beint í efni

Aðalsteinn Ásberg Sigurðsson

Æviágrip

Aðalsteinn Ásberg Sigurðsson er fæddur 22. júlí 1955 á Húsavík. Hann ólst upp á Öndólfsstöðum í Reykjadal í S-Þingeyjarsýslu. Aðalsteinn Ásberg lauk verslunarprófi frá Verzlunarskóla Íslands 1974 og stúdentsprófi frá sama skóla tveimur árum seinna. Hann stundaði nám í íslensku við Háskóla Íslands veturinn 1976-1977. Hann lagði stund á tón- og leiklist og sótti ennfremur námskeið í kvikmyndahandritagerð og leikritun.

Frá 1980 hefur Aðalsteinn helgað sig ritstörfum og tónlist. Hann hefur skrifað ljóðabækur og barnabækur auk þess að þýða verk erlendra höfunda. Fyrsta verk hans var ljóðabókin Ósánar lendur sem kom út árið 1977. Aðalsteinn Ásberg var einn af frumkvöðlum tónlistarfélagsins Vísnavina og var í hljómsveitinni Hálft í hvoru. Hann hefur einnig gefið út tónlistarefni fyrir börn ásamt eiginkonu sinni Önnu Pálínu Árnadóttur sem nú er látin.

Aðalsteinn Ásberg var framkvæmdastjóri Félags tónskálda og textahöfunda 1988-1998, forseti Nordisk Populærautor Union 1993-1995 og formaður Rithöfundasambands Íslands 1998 - 2006. Árið 2023 hlaut Aðalsteinn viðurkenningu Rithöfundasjóðs Ríkisútvarpsins fyrir árið 2022.

Mynd af höfundi: Nökkvi Elíasson.