Dragsúgur

Höfundur: 
Útgefandi: 
Staður: 
Reykjavík
Ár: 
1986
Flokkur: 

Úr Dragsúgi:

Blue Hawaii

Það er á horni Bayswater Road og Lækjargötu
sem tveimur skeggjuðum mönnum
gengur illa að finna orð
sem hæfa tíðarandanum,
en Kæra Susan,
 nú hefur Charlie Mingus
 slitið streng í hjartanu mínu,
mælir viðkvæmur liðþjálfi
í fjórðu herdeild hinna hugumstóru.
 Nú get ég aldrei meir
 tekið utan um þig af neinni
 hringlaga sannfæringu.
Sviti elskendanna í úthverfi Zürich
sprettur út á hannyrðakonu í Laos,
málmblástursmaður í subbulegum
 N-Noregskjallara
deyr beiskum dauða í rör sitt,
og af blöðum pálmanna, úr augum grátkvenna
renna skítug tár í
dósir merktar cat liver.
En það er á horni Bayswater Rd. og Lækjargötu,
að baki hverrar hríslu sem þær gægjast;
feimnu glötuðu meyjarnar,
jafn frísklegar og ferskjur sem
velta útaf, hillum ávaxtasala

hraðar en nokkur fær keypt.

----------------------------------------

Á Hólsfjöllum

Af hestinum
sem leiðist að bera mig
hlusta ég á brestina í fjöllunum.

Kippi í tauminn
við svarta krá
og bind hestinn við myrkrið.