um bókina
Íslandsbók barnanna er falleg og fræðandi bók um flest það sem einkennir eldfjallaeyjuna okkar. Hér er fjallað í máli og myndum um fjörur og fjallstinda, fiska og fugla, pöddur og blóm, sumarsól og vetrarmyrkur, þjóðgarða og borgarlíf, sjávarþorp og sveitir, þjóð og tungu, hraun og skóga, jökla og eyjar, vötn og sanda, ár og fossa og margt, margt fleira – vetur, sumar, vor og haust.
Margrét Tryggvadóttir ritar aðgengilegan texta sem öll fjölskyldan getur lesið saman og blæbrigðaríkar myndir Lindu Ólafsdóttur gera bókina að sannkölluðu listaverki.
úr bókinni
Stuðlaberg er fallegt sexstrent berg sem víða má sjá á Íslandi. Það myndast eftir eldgos þegar hraunið á yfirborðinu er orðið kalt en neðar í jörðinni er það ennþá sjóðandi heitt. Allt efni er þannig að að þenst út í hita en dregst saman í kulda. Heita hraunið tekur því meiri pláss en kalda hraunið sem klofnar við þrýstinginn í sexstrendinga.
Stuðlabergið hefur verið mörgum listamönnum innblástur. Guðjón Samúelsson arkítekt hafði stuðlabergið til dæmis til hliðsjónar þegar hann teiknaði Hallgrímskirkju og Þjóðleikhúsið, og listamanninum Ólafi Elíassyni finnst gaman að leika sér með þetta stærðfræðiform náttúrunnar eins og sjá má á tónlistarhúsinu Hörpu.
(s. 25)
