Af bókarkápu:
Félag matreiðslumanna og Félag framreiðslumanna eiga sjötíu ára afmæli 12. febrúar 1997. Í tilefni af því hefur Gylfi Gröndal rithöfundur skrifað þessa bók sem hlotið hefur nafnið Þjónusta, matur og menning, en hún bregður upp svipmyndum af félagsstarfi og fagmennsku matreiðslu- og framreiðslumanna frá upphafi vega. Þetta er sannkölluð baráttusaga, því þessar tvær stéttir voru í fyrstu réttlausar með öllu og þurftu að berjast fyrir viðurkenningu þjóðfélagsins í fimmtán ár. Matreiðsla og framreiðsla voru loks viðurkenndar sem iðngreinar 1941 og fyrsta sveinsprófið fór fram 1945. Þetta er viðburðarík saga um átök bæði innan félagsstarfsins og utan, en ævinlega hefur þróun mála stefnt í rétta átt skref fyrir skref. Síðustu áratugina hafa framfarirnar verið svo stórstígar að matreiðsla og framreiðsla standsast nú fyllilega samanburð við það sem best gerist erlendis. Reynt er að bregða upp lifandi og minnisstæðum svipleiftrum frá tvennum ólíkum tímum, og bókin er prýdd fjölmörgum skemmtilegum ljósmyndum, gömlum matseðlum og fleiri gögnum sem varpa ljósi á íslenska veitingasögu fyrr og nú.
