Um bókina
Kyrralífsmyndir er áttunda ljóðabók Lindu Vilhjálmsdóttur. Í bókinni eru ljóð ort í kófinu sem lagðist yfir samfélagið í vetur og vor – þessar vikur og mánuði þegar allt breyttist skyndilega, kunnuglegir hlutir urðu framandi, eðlileg samskipti lögðust nánast af og óttinn náði undirtökum.
Úr bókinni
kvikasilfursúlan
í hitamælinum rofnaði
og nú bifast hitinn
hvorki upp né niður
fyrir þrjátíu og átta gráður á selsíus
gekk uppá holtið
og þaðan niður að sjó
mætti miðaldra herramanni
sem hringsólaði kringum kirkjuna
á hjóli
virðulegri frú með skurðstofumaska
við heilsuverndarstöðina
og á sæbrautinni tók ég stóran sveig
framhjá vingjarnlegu gamalmenni
með staf
heilsaði engum
renni augunum
yfir gangana milli rekkanna
til að tékka á mannaferðum
í nýlenduvörudeild búðarinnar
skýst síðan eins og þjófur
með innkaupalista
milli hillnanna
og ryð vörum ofan í körfuna
við afgreiðsludaman
horfumst tortryggnar í augu
meðan við metum í huganum
bilið á milli okkar
hún með bláa latexhanska
ég með hvíta
hrafnarnir láta sig fjúka
í rokinu
og tjaldurinn spígsporar
í fjöruborðinu nýkominn heim
úti við sjóndeildarhringinn
glittir í varðskip
og á gráleitum himni
sigla íslandsblá ský
það er sporaslóð í sandinum
en varla maður á stangli
eitt
eilífðar smáljóð
í hæfilegri fjarlægð
sem snertir mannsbörnin
samt
