Um bókina
Spegilsjónir er áttunda ljóðabók Guðrúnar Hannesdóttur.
Úr bókinni
djúphygli
skýjafar var hagstætt
silfurskær maríutása sem vel mátti stikla eftir
en milli skýjanna blasti við svo hyldjúpur blámi
að ég sá mér þann kost vænstan að halla mér útaf
þannig gat ég horft upp í sjávarhvolfið
séð fiskana skjótast og smáverur stíga sinn dans
séð marglit ígulker og skeljarnar umvafðar þangi
hverfast í ljóstæru djúpi sem dökknaði er ofar dró
ég segi þér gullsatt - þetta var óhemjufagurt
og gerðist á meðan ég svaf
er nokkur með rakvélarblað á sér ...?
sjáðu hér
sagði augnlæknirinn
þetta svarta
hér neðst
eru skuggar
þetta svæði
skynjar ekki lengur
það sem fyrir augað ber
(undarlegt hvað svona svæsin og svæðisbundin tíðindi
smjúga án ummerkja inn í vitundina)
koma dagar
koma ráð
hugsaði ég bara
og sá fyrir mér
skuggana
sleppa út aftur
um nákvæma
grunna og hárfína
línu
