Beint í efni

Jón Gnarr

Æviágrip

Jón Gnarr er fæddur 2. janúar 1967 í Reykjavík. Hann er rithöfundur, leikari og leikstjóri og hefur skrifað fyrir leikhús, útvarp, sjónvarp og kvikmyndir, auk þess að koma fram sem uppistandari. Jón hefur einnig komið að tónlist og samið bæði lög og texta, þar á meðal textann við barnalgið ‚Prumpufólkið‘ sem var valið besta íslenska barnalagið í hlustendakönnun RÚV árið 2017.

Jón hefur komið víða við á starfsævi sinni, en utan ritstarfa og sviðslista er hann þekktastur fyrir að hafa stofnað Besta flokkinn árið 2009 og verið Borgarstjóri í Reykjavík árin 2010-2014. Hann var Dagskrárstjóri Stöðvar 2 frá 2015-2016, gestakennari við sviðslistadeild háskólans í Houston, Texas árið 2017 og gestarithöfundur við Rice háskólann í sömu borg.

Jón hefur hlotið fjölda viðurkenninga fyrir sviðslistir, Edduverðlaun fyrir leik og handrit (Bjarnfreðarson, Fangavaktin, Dagvaktin, Með mann á bakinu og Fóstbræður) og nokkrar tilnefningar til Grímuverðlauna fyrir leikrit. Árið 2014 hlaut hann International Playwright‘s award fyrir hugmyndina að Hótel Volkswagen og sama ár Friðarverðlaun Yoko Ono fyrir störf í þágu mannréttinda.