Auður Ava Ólafsdóttir hlýtur Bókmenntaverðlaun Norðurlandaráðs

Auður Ava Ólafsdóttir

2018

Auður Ava Ólafsdóttir hlaut Bókmenntaverðlaun Norðurlandaráðs 2018 fyrir skáldsöguna Ör. Mette-Marit krónprissessa Noregs afhenti henni verðlaunin á verðlaunahátíð Norðurlandaráðs í Óperunni í Osló. 

Í rökstuðningi dómnefndar segir:

„„Ég er að skrifa gegn myrkrinu í heiminum,“ segir Auður Ava Ólafsdóttir, handhafi bókmenntaverðlauna Norðurlandaráðs 2018. Í Ör kynnumst við miðaldra karlmanni sem ferðast til stríðshrjáðs Evrópulands í þeim tilgangi að fyrirfara sér, með verkfærakassa í farteskinu. Meðan á ferðinni stendur rennur upp fyrir honum að allir eiga sér verkfærakassa og geta valið hvernig þeir beita verkfærunum. Ör er lítil bók með stórt hjarta. Hún er full af útsmognum húmor og leiftrandi fjörugu tungumáli og spyr jafnframt áleitinna spurninga um lífið og dauðann, um einstaklinginn gegn heildinni, um forréttindi fólks, réttindi þess og skyldur í heiminum. Ekki síst þá skyldu að leyfa mennskunni að storka myrkrinu.“

Lesið meira um verk Auðar Övu á höfundasíðum hennar hér á vefnum