Bréf til Íslands - Letters to Iceland

Þrjú þekkt skáld koma fram í Reykjavík

Bresku skáldin Lavinia Greenlaw og Simon Armitage, sem er nýskipað lárviðarskáld Bretlands, og írska skáldið Paul Muldoon eru væntanleg til Íslands nú í júní til að taka þátt í tveimur viðburðum í Bókmenntaborginni Reykjavík. Viðburðirnir eru tengdir undir heitinu Letters to Iceland og standa Háskóli Íslands/Bókmennta- og listfræðastofnun, Reykjavík bókmenntaborg UNESCO og bókaútgáfan Dimma að dagskránni. Í tilefni heimsóknarinnar gefur Dimma út bækur með ljóðum gestanna í íslenskum þýðingum Magnúsar Sigurðssonar, Sigurbjargar Þrastardóttur og Sjóns. 

Hvatamenn að komu skáldanna til Íslands eru Ástráður Eysteinsson prófessor og rithöfundurinn Sjón og eru þessir viðburðir í óbeinu framhaldi af alþjóðlegri eyjabókmenntaráðstefnu sem haldin var í Færeyjum fyrir tveimur árum. Að þessu sinni er lögð áhersla á tengsl Bretlandseyja og Íslands og þá einkum á Ísland og norðrið sem viðfangsefni og áfangastað Bretlandseyjaskálda, bæði valinkunnra skálda á fyrri tíð, s.s. William Morris, W.H. Auden, Louis MacNeice og Seamus Heaney, og þriggja af þekktustu ljóðskáldum samtímans á Bretlandseyjum. Þeim er boðið til landsins af þessu tilefni en þetta eru fyrrnefnd Lavinia Greenlaw, Simon Armitage og Paul Muldoon. Auk þess að vera skáld og rithöfundar eru þau jafnframt kennarar í ritlist við virta háskóla. 

Letters to Iceland - gestir á norðurslóðum 

Föstudaginn 21. júní kl. 16 verður málþing í Veröld þar sem fjallað verður um tengsl Bretlandseyja og Íslands og um leið ferðir Bretlandseyjaskálda norður á bóginn fyrr og síðar. Málþingið verður þríþætt, Sveinn Yngvi Egilsson ræðir við hið nýja lárviðarskáld Bretlands, Simon Armitage, um ljóð þess síðarnefnda en einnig um Íslandstengsl Audens og MacNeice og skáldskap sem af þeim tengslum spratt; Kristín Svava Tómasdóttir ræðir við Lavinu Greenlaw um ljóðlist hennar og um tengsl Williams Morris við Ísland, og Aðalsteinn Ásberg Sigurðsson ræðir við Paul Muldoon um norðursýn hans og landa hans, Nóbelsskáldsins Seamusar Heaneys. Rektor Háskóla Íslands, Jón Atli Benediktsson, opnar viðburðinn og málstofustjóri er skáldið Sjón.

Letters to Iceland - Útgáfa og upplestur

Laugardaginn 22. júní kl. 15 verður dagskrá í Norræna húsinu þar sem skáldin þrjú og þýðendur þeirra flytja ljóð og svara spurningum. Sigurbjörg Þrastardóttir er þýðandi Simons Armitage, Magnús Sigurðsson þýddi ljóð Laviniu Greenlaw og Sjón íslenskaði nokkur ný og áður óbirt ljóð eftir Paul Muldoon. Arna Schram, sviðsstjóri menningar- og ferðamálasviðs Reykjavíkur, opnar samkomuna og Ástráður Eysteinsson, prófessor við Háskóla Íslands, stýrir dagskránni.

Þá verður fagnað útgáfu ljóðaþríleiksins Letters to Iceland sem samanstendur af þremur tvímála bókum með úrvali ljóða eftir skáldin sem sækja okkur heim ásamt íslensku þýðingunum. Bækurnar eru Sjö ljóð eftir Paul Muldoon, Kennsl eftir Laviniu Greenlaw og Þaðan sem við horfum eftir Simon Armitage. Ritstjórar eru Aðalsteinn Ásberg Sigurðsson og Ástráður Eysteinsson og bókaútgáfan Dimma gefur bækurnar út. Hægt verður að kaupa bækurnar á viðburðinum og fá þær áritaðar af höfundunum.

Það er einstakur heiður að fá til landsins nýkrýnt lárviðarskáld Breta ásamt tveimur öðrum af þekktustu ljóðskáldum samtímans á enska tungu til að ræða tengsl sín við norðrið.  

Ekkert kostar inn á viðburðina. Verið öll hjartanlega velkomin. 

Um skáldin

PAUL MULDOON

Paul Muldoon er eitt virtasta skáld á enska tungu í dag. Hann fæddist á Norður-Írlandi árið 1951 og hóf feril sinn 1971 sem ungskáld undir verndarvæng Seamusar Heaneys. Síðan þá hefur hann gefið út fjölda ljóðabóka og þýðinga. Meðal fjölmargra verðlauna sem hann hefur hlotið fyrir verk sín eru Pulitzer verðlaunin sem hann fékk fyrir ljóðabókina Moy, Sand and Gravel árið 2003. Í ljóðum sínum fléttar Paul Muldoon saman tilvísunum úr fornum skáldskap og nýjum og oftar en ekki eru þær í íslenskar miðaldabókmenntir.

Paul Muldoon er Princeton Chair of Poetry. 

LAVINIA GREENLAW

Lavinia Greenlaw, sem fæddist árið í London árið 1962, er lykilskáld í hópi enskra skálda sem ung stigu fram á sjónarsviðið á 9. áratugnum. Þótt hún sé helst þekkt sem ljóðskáld hefur Lavinia gefið út skáldsögur, skrifað líbrettó, hljóðverk og útvarpsleikrit. Hún hefur hlotið ýmsar viðurkenningar og tvisvar verið tilnefnd til T.S. Eliot verðlaunanna. Í mörgum ljóða sinna lítur Lavinia í norður og í bókinni Questions of Travels skrifast hún á við brot sem hún valdi úr dagbókum Williams Morris úr Íslandsför hans.

Lavinia Greenlaw er prófessor í ritlist við Royal Holloway háskólann í London.

SIMON ARMITAGE

Simon Armitage er nýkrýnt lárviðarskáld Bretlands. Hann fæddist 1963 í Huddersfield og starfaði sem skilorðsfulltrúi fyrir unga afbrotamenn þar til hann sneri sér alfarið að skáldskap um miðjan 10. áratuginn. Simon er ljóðskáld, ferðabókahöfundur og þýðandi Ódysseifskviðu og forns ensks skáldskapar á nútímamál. Árið 1994 fetaði hann í fótspor W.H. Audens og Louis MacNeice ásamt Glyn Maxwell og svöruðu þeir bókinni Letters from Iceland með sinni eigin Moon Country. Simon hefur hlotið fjölmörg verðlaun sem veitt eru fyrir skáldskap í hinum enskumælandi heimi.

Simon Armatage var Oxford Chair of Poetry frá árinu 2015 þar til í vor.