Mótþrói - ljóð um fullveldi

Fríða Ísberg ljóðskáld og ritstjóri Mótþróa.

Í tilefni af fullveldisafmæli Ísland opnar Bókmenntaborgin Reykjavík októbermánuð með ljóðaviðburðinum Mótþróa í Iðnó þann 1. október kl. 20. Samhliða viðburðinum verða gefnar út tvær ljóðaarkir með ljóðum sem ort voru í tilefni fullveldisafmælisins.

Ljóðin voru ort í ritsmiðjum í maí og júní sem haldnar voru í tveimur skáldahúsum, Gröndalshúsi í Reykjavík og Skriðuklaustri í Fljótsdal. Smiðjurnar voru undir stjórn ljóðskáldsins Fríðu Ísberg sem einnig er ritstjóri ljóðverksins.
Skáldin komur saman og ræddu fullveldi þjóðar og fullveldi/sjálfstæði einstaklingsins og hvernig skilningur okkar á hugtökunum hefur breyst frá árinu 1918.  

Smiðjurnar voru framkvæmdar með styrk frá Fullveldissjóði Íslands.

Viðburðurinn í Iðnó 1. október hefst með ávarpi Andra Snæs Magnasonar rithöfundar og formanns stjórnar Bókmenntaborgarinnar. Fríða Ísberg flytur síðan stefnuyfirlýsingu Mótþróaskáldanna og loks flytja skáldin brot úr verkum sínum. Á viðburðinum verður útgáfu ljóðverksins Mótþróa fagnað og fá gestir eintak af ljóðverkinu.

Skáldin eru: Anna Hafþórsdóttir, Brynjólfur Þorsteinsson, Ella Wiberg, Eydís Blöndal, Fríða Ísberg, Hertha Richardt Úlfarsdóttir, Hólmfríður María Bjarnardóttir, Jón Örn Loðmfjörð, Nanna Vibe, Ragnheiður Harpa Leifsdóttir, Sólveig Eir Stewart, Stefanía dóttir Páls, Úlfur Bragi Einarsson, Þorvaldur Sigurbjörn Helgason.

Mótþrói í Vonarstræti

Ljóðverkin lifa áfram í Bókmenntaborginni út októbermánuð á vegg Ráðhússins í Vonarstræti þar sem þeim verður varpað upp í hauströkkrinu.