Úr Sjálfsmyndum
Upplag
Óspart var mér hrósað í æsku
fyrir það eitt að vera þægur
sem ég gat vísast verið
án mikillar fyrirhafnar.
Erfitt að átta sig í glerhörðum rauntíma
á því hvernig geðprýðin leiðir í ógöngur
og verður grandvörum manni að fjörtjóni
þrátt fyrir ágætis upplag.
...
Meðan söngurinn hljóðnar
Eyja á bláum flóa
undir nýkveiktu tungli
sigling um tímans haf
meðan söngurinn hljóðnar.
Ferjan er komin
að flytja þig burt af landi
í svipleiftri dagarnir allir
dýrmætar stundir.
Þú kveður í þögn
þarflaust að tefja lengur
í nótt þar sem lágstemmd
lognaldan vakir.
Fjörðurinn úthafsblár
aðventuklukkur hringja
senn lætur ferjan úr höfn
og söngurinn hljóðnar.
(24-5)
