Þegar lögreglan knúði dyra hjá séra Bersa, sem var búinn að týna húslyklunum í sjóinn, kom frúin til dyra. Hún var sprenglærð í Alanon-fræðunum og harðneitaði að taka við eiginmanni sínum. Þess vegna svaf hann og vaknaði morguninn eftir í steininum. Það var slíkt áfall að hann fékk aðstoð lögreglunnar til að panta pláss á Vogi.
Séra Bersi er staddur á Vogi þessa stundina vegna þess að hann fór í aðgerð á sjúkrahúsi og þurfti að undirgangast svæfingu. Hann er að takast á við sjúkdóminn á ábyrgan hátt með fyrirbyggjandi aðgerðum.
Hann er lífsreyndur maður, ofurlítið angurvær og skilur að lífið er ekki auðvelt. Eftirlætismálsháttur hans sem ekki er úr ritningunni fjallar um ævistundirnar eða stundirnar í sólarhringnum.:
Omnes vulnerant, postuma necat. Allar særa, hinsta deyðir, segir sér Bersi enda er hann jafn sprenglærður í latínu, grísku og hebresku og hann er virðulegur í fasi. Engan sem ekki þekkir hann mundi nokkru sinni gruna að þessi hógværi sómaklerkur hafi nokkru sinni svamlað ofurölvi innan um unga og vaska lögregluþjóna í Reykjavíkurhöfn ein og trylltur marbendill.
(s. 77-78).
