Ljóð eftir Þórdísi og myndir eftir Jesse Ball. Bókin kom út í ritröðinni Norrænar bókmenntir (bók nr. 8).
Úr Og svo kom nóttin:
1.
Skógurinn fylltist
af verum sem sungu
með gulnuðum röddum
og sveimuðu
eins og heitur blærinn
yfir hvolfinu
sem fyllti mig gleði
svo ég hallaði mér niður
fann mig leysast upp í friði
og renna hægt í burtu
eins og vatn
------------
9.
Það brakaði í greininni
og hann hagræddi sér betur
dró fæturna upp að sér
og krækti höndunum í kring
með steininn í heitum lófanum
Náttugla eða leðurblaka?
Vonandi verður nóttin
ekki lengri en áður
og vonandi verður suðið
ekki háværara en fyrr
sagði hann
og hugsaði um liðnar nætur
----------
21.
Og hann klemmir saman augun
Við skulum vera hérna uppi
þar til dagar
hverfa síðan ofan í grasið
fyrir neðan
Við skulum haldast í hendur
og vera saman
uns við föllum til jarðar
og deyjum og deyjum
og deyjum
