Um þýðinguna
Scum eftir Isaac Bashevis Singer. Hjörtur þýddi úr ensku.
Í skáldsögunni Gallagrip eftir Isaac Bashevis Singer (1904-1991) er því lýst hvern dilk það dregur á eftir sér þegar veiklundaðan en tungulipran hrakfallabálk skortir heilindi, siðferðisþrek og skapfestu til þess að stjórna lífi sínu.
Sagan gerist í Varsjá á nokkrum dögum árið 1906. Max Barabander er pólskur gyðingur með vafasama fortíð eins og ýmsir sem hann umgengst. Hann hefur lengi verið búsettur í Buenos Aires, hefur auðgast þar og er orðinn argentískur ríkisborgari. Eftir áfall í einkalífi sínu er hann aftur kominn á fornar slóðir í Póllandi í örvæntingarfullri leit að lífsfyllingu og sálarfriði sem ber þó lítinn árangur og snýst á undraskömmum tíma upp í hreina martröð.
