Af bókarkápu:
Í minningum Tómasar Þorvaldssonar er ýtarlega sagt frá mannlífi og menningu, sem nú heyrir fortíðinni til; tímum, sem eru liðnir og koma ekki aftur. Tómas gerðist kornungur sjómaður, kynntist áraskipum í bernsku og var sem unglingur á trillu, þegar vélar höfðu verið settar í opnu bátana. Hann tók þátt í verkalýsðbaráttu á tímum kreppu og allsleysis, en varð síðar útgerðarmaður og settist þá hinum megin við samningaborðið. Með þátttöku sinni í björgunarstarfi og slysavörnum vann hann ötullega að því að bæta aðstöðu og öryggi sjómanna, og hann hefur ferðast um heiminn þveran og endilangan til að selja fiskafurðir okkar á sem hagstæðustu verði. ,,Leið mín hefur legið frá gamla Íslandi til hins nýja, segir Tómas á einum stað í þessari bók, ,,frá kröppum kjörum til allsnægta; frá þrotlausu striti til þæginda og tækni nútímans.
