Úr Fiskur af himni
21.11.14
Ég geng út af bar í miðbænum
rétt fyrir kvöldmat
og set á mig húfuna
hreifur af bjór
Beggja vegna við augun
sé ég glitta í húfubarmana
og finn svo vel
hvað þessi bær hefur verið mér góður
Yrði honum læst fyrir mér á morgun
kveddi ég sáttur
þá svölu borg á hafsenda
þá trjákrúnuveröld fulla af ljómandi eldhúspartíum
samræðum fullum af Íslandskrafti
og heimsófrægu eyfrelsi
hraustfögrum og hnarreistum gáfukonum með góða grind
og enn betri húmor
sem hlæja hátt og vaka lengi
og gráta aðeins af reiði
en halla sér upp að náttbjörtum eldhúsbekknum
með glasið fullt af glensi
á trendsögulegum klæðum með annað augað
á næstu kynslóð þar sem hún kemur
út af klóinu
Ég er búinn að fara yfir það flest
með pensli og aftur
og hafa upp úr því bjórfljóti börn og bækur
En þar til að því kemur
(að ég verði bannaður frá þessum bæ)
læt ég fara vel um mig
hérna á milli húfubarmanna
(18-9)
