Af bókarkápu:
Fáum höfundum er jafn lagið að fjalla um sögu myndlistar í senn ljóst og fræðilega og Birni Th. Björnssyni, enda hafa bækur hans notið einstakrar hylli lesenda. Aldaslóð er með svipuðu sniði og ein af fyrri bókum hans, Aldateikn, sem miklar vinsældir hlaut á sínum tíma. Í þessari bók rekur höfundur ýmsa þætti úr sögu myndlistarinnar með hliðsjón af því umhverfi og þeim tíðaranda sem verkin eru sprottin úr. Rætt er um almanakið ,,Gullnu stundirnar sem talið er eitt af perlum evrópskrar myndlistar við lok gotneska stílsins, hið fræga málverk ,,Arnolfini og brúður hans eftir Jan van Eyck, ógnvekjandi myndheim Hieronymusar Bosch í ,,Dauðasyndunum sjö, höggmyndir dagsstundanna eftir Michelangelo og barokkverkin ,,Dómur Parísar eftir Rubens, ,,Batseba eftir Rembrandt og ,,Mjólkurstúlkan etir Vermeer. Frá 19. öld kynnumst við tilurð tímamótaverks Géricaults, ,,Flekinn af Medúsa og hneykslunarhellu Manets, ,,Morgunverðurinn í skóginum. Stórverk Picassos, ,,Lífið frá 1903, rekur svo lestina.
