Um bókina
Niðurfall - og þættir af hinum dularfulla Manga er fyrsta bók Hauks Ingvarssonar þar sem snörp ljóð takast á við lengri texta um ævintýri ljóðmælanda og vinar hans í sveit og borg.
Úr bókinni
Fornir skuggar I
Mangi vinur minn er listmálari og reyndar skáld líka þegar þannig liggur á honum. Skáldskapur hans sprettur af einhverri blóðborinni kerskni sem kemur fram í skrumskælingum og stælingum á mínum kveðskap sem hann kallar "póetíska tilgerð" og stundum velur hann honum jafnvel háðsyrði eins og "módern" sem mér skilst að þýði gamaldags.
Um daginn kom ég í skemmuna hans, sem hann kallar Hellinn, og fylgdist með honum draga útlínur vel þekktra fígúra á strigann. Að baki honum var myndvarpi og skugginn af Manga flögraði um hvítann flötinn. Að lokum sneri hann sér að mér og ég kallaði til hans yfir þvert gólfið (eins og leikari á sviði):
"Það er nú lítið mál að vera málari, maður tekur bara
myndvarpa og málar eftir fyrirmyndum annarra."
Mangi leit ekki við mér en greip bók eins og af handahófi og sendi hana yfir sviðið. Hún hringsnerist á rykugu gólfinu með miklum hvin uns hún staðnæmdist og ég tók hana upp. Þetta var Íslensk orðabók í ritstjórn Árna Böðvarssonar. Svo leit Mangi upp í ljósið frá myndvarpanum og mælti af spámannlegum þunga:
"Það er nú lítið mál að vera skáld, maður tekur bara
orðabók og raðar upp úr henni orðum og kallar ljóð."
Svo slökkti hann á myndvarpanum og myrkrið féll yfir Hellinn eins og leiktjald.
